Այսօր հայկական շուկան լի է ամենատարբեր խաղալիքներով և ժամանցային խաղերով, որոնք կոչված են երեխայի մոտ զարգացնելու մտավոր, տեխնիկական, գեղագիտական և մի շարք այլ հմտություններ: Խաղալիքի ընտրությունը բարդ հիմնահարց է, քանի որ դաստիարակչական գործոնից զատ այն նաև երեխաների առողջությանը առնչվող գերխնդիր է, որը շատ արդիական է և պահանջում է հետևողական մոտեցում: Ցավոք պետք է նշել, որ հայաստանյան շուկայում գրեթե չկա բացարձակ անտանգ և որակյալ խաղալիք: Այդ շուկան հեղեղված է ամեն տեսակ խաղալիքներով`շատ մեծ և բավականին փոքր, բրդոտ և պատրաստված այլ նյութերից, ձայնով և անձայն, առաձգական, կոշտ և այլն: Խաղալիքները դեռևս հին ժամանակներից պատրաստվել են ամենատարբեր բնական նյութերից (փայտ, գործվածք, թել և այլն), իսկ այժմ կիրառվում են պոլիմերային նյութերը, որոնք տեխնոլոգիական տեսանկյունից չափազանց հարմար են և ենթակա հեշտ մշակման: Սակայն դրանք գունավորվում են զանգվածի մեջ, ինչն առավել անվտանգ է, կամ ներկվում են մակերեսից: Հաշվի առնելով այն, որ երեխաների մեծ մասը խաղալիքները տանում է բերանը և շատ այլ եղանակներով շփման մեջ մտնում դրանց հետ (հոտային, շոշափելիքներ), ապա երեխայի ֆիզիկական առողջությունը նույնպես կարևոր հիմնախնդիր է բարոյահոգեբանականի հետ հավասարապես: Հայաստանում խաղալիքները, համաձայն գործող տեխնիկական կանոնակարգի, ենթակա են պարտադիր սերտիֆիկացման: Կատարվում են գնահատում և սերտիֆիկացում երեխաների համար ֆիզիկական և կենսաբանական տեսանկյունից: Բայց եթե կոնկրետ խմբաքանակը ներմուծման պահին չի սերտիֆիկացվում, իրացումը կատարվում է առանց վերահսկողության, քանի որ ներմուծողը ինքնակամ չի սերտիֆիկացնում ապրանքը: Մանկական խաղալիքներին ներկայացվում են հետևյալ հիմնական պահանջները`

• Հումքային անվտանգություն և արտաքին ձևավորման համար օգտագործվող ծածկույթներ, որոնք չպետք է պարունակեն քիմիապես թունավոր և ալերգիա հարուցող տարրեր
• Մանրէաբանական անվտանգություն
• Արտահայտված հոտի առկայություն, գույն և գունային հարաբերություններ, որոնք կարող են ազդել երեխայի հոգեկանի, ինչպես նաև ձևավորվող ճաշակի վրա
• Խաղալիքներից առաջացած ձայնի մակարդակ
• Էլեկտրական խաղալիքների դեպքում էլեկտրամագնիսական դաշտի լարվածության թույլատրելի մակարդակներ (չպետք է առաջանա 24վ գերազանցող լարում)
• Խաղալիքների սուր անկյունների վնասվածք առաջացնելու ռիսկը նվազագույնի հասցնել
• Այրման-վառման վտանգ պարունակող, պայթունավտանգ և ցնդող վնասակար նյութերի բացակայություն (այս նյութերը կարող են առաջացնել օդում բոցավառվող գոլորշիներ կամ պայթուցիկ խառնուրդներ) և շնչահեղձության վտանգի բացառում
• Ճառագայթաակտիվ և թունավոր տարրերի բացակայություն (այս տարրերը չպետք է գերազանցեն տեխնիկական կանոնակարգում սահմանված մակարդակները)

Խաղալիք գնելիս անպայման ուշադրություն դարձրեք վերոնշյալ կետերին և պահանջեք վաճառողից խաղալիքի սերտիֆիկատը: Բացակայության դեպքում հրաժարվեք այն գնելուց: Լինելով տեղեկացված և խստապահանջ սպառող` Դուք կստիպեք փոխել վաճառողին իր մոտեցումները` հրաժարվելով անորակ խաղալիքներից և բացառելով դրանց առկայությունը շուկայում:

16 December 2022, Friday | 698